هصدقك فى كل اللى هتقوله عن سبب انفجار أو اصطدام أو زى ما انت عاوز تقوله عن حادث معهد الأورام٠ ومش هسالك عن حجم الضحايا والمصابين ولا أكياس الأشلاء فى موقع الحادث ولا عن أسماء اللى راحوا ونحتسبهم عند الله شهداء؟! بس وحياة أبوك جاوبنى وقل لى عن حال مرضى الأورام فى المعهد القومى وعن حال أهاليهم اللى جاءوا من كل ربوع مصر ويفترشون رصيف الشارع المقابل؛ منتظرين حد يطمنهم عن مريضهم وعن نتيجة جلسة الكيماوى واللا الإشعاعى واللا مريضهم لسه حى يرزق ولا فى طريقه لتلاجة المعهد وبين لحظة والتانية هييجوا يستلموه؟ كلمنى عن الإهمال ومعاملة البشر معاملة الحيوانات وعن ضعف العلاج وضعف الإمكانيات، وعن تكدس الحجرات بعشرات المرضى وعن التلوث والعلاج الناقص وروح هاته من بره!
كلمنى عن فقراء مصر فى معهد الأورام وفى مستشفيات مصر كلها؟ كلمنى عن مصر اللى ماشية عكس الاتجاه وبدل ماتهتم بالبشر بتهتم بالحجر؟! بتبنى مدن ومنتجعات فى الصحراء؟ كلمنى عن صندوق تحيا مصر وفلوس الزكاة والجمعيات وأثرياء مصر، وازاى اللى يحتاجه الفقراء من المرضى؛ يحرم على بناء العاصمة والمنتجعات وعلى الجامع والكنيسة كمان!.
ياسادة معهد الأورام وفقراء معهد الأورام صورة من مصر وفقراء مصر؟! بس تقول لمين وحسبنا الله ونعم الوكيل.
--------------------
بقلم: خالد حمزة
